கொள்ளையர் 10 பேர் கைது : 12 மணி நேரத்துக்குள் பிடிபட்டனர்
சென்னையில் நள்ளிரவு முதல் காலை வரை தொடர்ந்து எட்டு வழிப்பறிகளில் ஈடுபட்ட கொள்ளையர்கள் 10 பேரை 12 மணி நேரத்திற்குள் பிடித்த காவல்துறையினர் அவர்களிடம் இருந்து நகை, பணம் உள்ளிட்ட பொருட்களை மீட்டுள்ளனர். சென்னை மயிலாப்பூர் லஸ் அருகே புதன் நள்ளிரவில் பாலாஜி என்கிற ஆட்டோ ஓட்டுநரை இருசக்கர வாகனத்தில் வந்த கொள்ளையர்கள் வழிமறித்துத் தாக்கி அவரது செல்போனைப் பறித்துச் சென்றனர். குற்றவாளிகளான யமகா ராகுல், பரத்குமார் ஆகிய இருவரையும் 12 மணி நேரத்துக்குள் கைது செய்தனர். இவர்கள் வழிப்பறி செய்த பொருட்களைப் பதுக்கி வைத்திருந்த கூட்டாளிகளான தனுஷ், சூர்யா, ராகேஷ், ராகுல், கார்த்திக், விஜய் மணிகண்டன், மணி, சஞ்சய் ஆகியோரையும் நேற்று மாலைக்குள் அடுத்தடுத்துக் கைது செய்தனர். கொள்ளையர்களிடம் இருந்து 5 இருசக்கர வாகனங்கள், 11 செல்போன்கள், தங்க நகைகள் உள்ளிட்ட பொருட்களைக் காவல்துறையினர் மீட்டனர். வழிப்பறிக் கொள்ளைகள் நிகழ்ந்து 12 மணி நேரத்துக்குள் குற்றவாளிகளைக் கைது செய்து சிறைக்கு அனுப்பிய தனிப்படையினரைக் காவல் ஆணையர் நேரில் அழைத்துப் பாராட்டினார்.
