பின்லாந்து கல்வி அமைச்சரை சந்தித்து ஆலோசனை நடத்தினார் அமைச்சர் செங்கோட்டையன்

பின்லாந்தில் சுற்றுப்பயணம் மேற்கொண்டுள்ள தமிழக பள்ளிக்கல்வித்துறை அமைச்சர் செங்கோட்டையன், அந்நாட்டு கல்வி அமைச்சரை சந்தித்துப் பேசினார். தமிழகத்தில் பள்ளிக் கல்வியின் தரத்தை மேம்படுத்துவதற்காக, பின்லாந்து நாட்டில் சுற்றுப்பயணம் மேற்கொண்டு, அங்கு கல்வி மற்றும் கற்பித்தல் முறை குறித்து அமைச்சர் கோட்டையன் அறிந்து வருகிறார். ஐந்தாம் நாள் பயணத்தில் அந்நாட்டு அறிவியல், கல்வி மற்றும் கலாச்சாரத்துறை அமைச்சர் ஹண்ணா கோ இன் மற்றும் துறையின் செயலர் அனிதா லக்கி கோயன், பன்னாட்டு தொடர்பு அதிகாரி ஜானா பாலா ஜாவி ஆகியோரை சந்தித்து செங்கோட்டையன் கலந்துரையாடினார். பள்ளிக்கல்வித்துறை முதன்மை செயலாளர் பிரதீப் யாதவும் அப்போது உடன் இருந்தார். சூழ்நிலையியல் விவசாயம் குறித்து அறிந்து கொள்ள அங்குள்ள வேளாண்மை பண்ணைக்கும் சென்று பார்வையிட்டார். முன்னதாக துர்க் பகுதியில் அமைந்துள்ள ஆசிரியர் பயிற்சி கல்லூரியை பார்வையிட்ட அமைச்சர், அங்கு ஆசிரியர்களுக்கு வழங்கப்படும் கற்றல் மேம்பாட்டு பயிற்சி குறித்து ஆலோசனை மேற்கொண்டார்.